امال مەرەكەسى جىلداعى داستۇرگە سايكەس حالىقارالىق دارەجەدە تويلانادى. وتپان تاۋدا 40-تان استام كيىز ءۇي تىگىلىپ, ءتۇرلى كونتسەرتتىك, سپورتتىق ءىس-شارالار وتكىزىلەدى.
بۇل تۋرالى قوعامدىق كوممۋنيكاتسيا ورتالىعىندا وتكەن بريفينگتە ماڭعىستاۋ وبلىستىق مادەنيەت, ارحيۆتەر جانە قۇجاتتاما باسقارماسىنىڭ ءبولىم باسشىسى اسەم ءاشىروۆا مالىمدەدى. امال مەرەكەسىنە قر پرەزيدەنتى اكىمشىلىگىنىڭ, مادەنيەت جانە اقپارات مينيسترلىگىنىڭ وكىلدەرى, استانا, الماتى, شىمكەنت قالالارى مەن وڭىرلەردەگى اكىمدىك وكىلدەرى جانە تۇرىك ەلىنەن جىرشى يرفان گەردال, وزبەكستاننان مۋحامماد ەشبوەۆ, قاراقالپاقستاننان سالامات اياپوۆ شاقىرىلىپ وتىر.
13 ناۋرىز كۇنى «وتپان» تاريحي-مادەني كەشەنىنىڭ جىڭعىلدى اۋىلدىق اتشابارىندا ات بايگەلەرى, قىز قۋ, تازى جۇگىرتۋ سياقتى ۇلتتىق سپورت ويىندارى وتكىزىلىپ, كەيىن «اقساراي» مۋزەي كەشەنى تانىستىرىلادى. مەرەكەلىك دۋمان ءارى قاراي ماڭعىستاۋ اۋدانىنداعى ونەرپازداردىڭ كونتسەرتتىك باعدارلاماسىمەن جالعاسىن تابادى. وعان قوسا «قاراشاڭىراق» الاڭىنداعى ساحنادا تەاترلاندىرىلعان قويىلىم كورسەتىلىپ, قازاقستاننىڭ حالىق ءارتىسى روزا رىمباەۆا, ءانشى ءالي وقاپوۆ, ءمادي رىمباەۆ ونەر كورسەتەدى. ودان بولەك تۇركيا, وزبەكستان, قاراقالپاقستاننان ارنايى كەلگەن جىرشىلاردىڭ جانە وبلىس ونەرپازدارىنىڭ مەرەكەلىك كونتسەرتى وتپەك.
سونداي-اق «قاراشاڭىراق» عيماراتى ساحناسىندا «بىرلىك وتىن» جاعۋ ءراسىمى, كەشكى قوناقاسى, اۋىزاشار داستارحانى جايىلادى. مەرەكەلىك ءىس-شارا تۇركيا, وزبەكستان, قاراقالپاقستان ەلدەرىنەن كەلگەن جىرشىلار جانە وبلىس جىرشىلارىنىڭ قاتىسۋىمەن جىر كەشىنە, وڭىرلىك جازبا اقىندار ءمۇشايراسىنا ۇلاسادى.
مەرەكەلىك توي-دۋماننىڭ ەكىنشى كۇنى 14 ناۋرىزدا وتپان تاريحي-مادەني كەشەنىندە تۇپقاراعان, قاراقيا, مۇنايلى اۋداندارى مەن جاڭاوزەن قالاسى ونەرپازدارىنىڭ كونتسەرتتىك باعدارلاماسى جوسپارلانعان. بۇدان بولەك قازاق كۇرەسى, تۇيە پالۋان سياقتى ۇلتتىق سپورت سايىسى ۇيىمداستىرىلىپ, «سالەم — ءسوزدىڭ اتاسى» جانە «قاراقازاننان ءدام تاتۋ» مەرەكەلىك ءىس-شارالارى, «تۇساۋىڭدى كەسەيىن, كۇرمەۋىڭدى شەشەيىن» اتتى تانىمال تۇلعالاردىڭ سابيلەرىنىڭ تۇساۋىن كەسۋ ءراسىمى وتەدى. وتپانداعى مەرەكەلىك ءىس-شارا مۇڭال اتا ۇرپاقتارىنىڭ «بىرلىك وتىن» قوساي اتا ۇرپاقتارىنا تابىستاۋ راسىمىمەن قورىتىندىلانادى.
«سونىمەن قاتار قالا, اۋدانداردا «نۇر ناۋرىز - حالىق تويى» اتتى باۋىرساق party, ناۋرىز كوجە جارمەڭكەسى, «ابىسىن تاتۋ بولسا» اۋداندىق ابىسىندار بايقاۋى, «جىردىڭ باسى – ءاز ناۋرىز» اتتى جىر كەشى, «كەلىندەر بايقاۋى -2024», «اس ادامنىڭ قۋاتى» اتتى ۇلتتىق تاعامداردان جارمەڭكە, «نۇر سەبەلە, ۇلىستىڭ ۇلى كۇنى» اتتى قازاقتىڭ ۇلتتىق ويىندارىنان سايىس وتكىزىلەدى», دەدى اسەم ءاشىروۆا ءسوزىن جالعاپ.
امال مەرەكەسى 14 ناۋرىز كەشكى ساعات 19:00-دە اقتاۋ قالاسىنداعى امفيتەاتر ساحناسىندا روزا رىمباەۆا, ءانشى ءالي وقاپوۆ, ءمادي رىمباەۆ جانە ماڭعىستاۋ ونەر جۇلدىزدارىنىڭ كونتسەرتىمەن اياقتالادى.
